Poet
zaḳhm to bahut aa.e phir bhi hausla rakkha
umr-bhar mohabbat men ham ne dil baḌa rakkha
jis ne ek lamha bhi tujh se vasta rakkha
apne-ap ko ḳhud se umr-bhar juda rakkha
barg-e-ḳhushk ki surat log ho ke avara
sochte hain sarsar ka naam kyuun saba rakkha
jab use na aana tha phir ye kis tavaqqo.a par
ham ne ghar ka darvaza rat-bhar khula rakkha
dil gham-e-zamana ki dastaras men kya aata
pattharon ki zad par ḳhud ham ne aa.ina rakkha
ishq ko saliqe se kuchh hamin ne barta hai
varna qurbaton men yuun kis ne fasla rakkha
yaad kar ke ro.ega tu suluk ghairon ka
tu ne ‘ḳhavar’ apnon se kuchh jo vasta rakkha
Leave a Reply