Bedam Shah Warsi
sahara maujon ka le le ke badh raha huun main
safina jis ka hai tufan vo nakhuda huun main
khud apne jalva-e-hasti ka mubtala huun main
na muddai huun kisi ka na muddaa huun main
kuchh aage alam-e-hasti se gunjta huun main
ki dil se tuute hue saaz ki sada huun main
pada hua huun jahan jis tarah pada huun main
jo tere dar se na uthe vo naqsh-e-pa huun main
jahan-e-ishq men go paikar-e-vafa huun main
tiri nigah men jab kuchh nahin to kya huun main
tajalliyat ki tasvir khinch kar dil men
tasavvurat ki duniya basa raha huun main
junun-e-ishq ki nairangiyan are tauba
kabhi khuda huun kabhi banda-e-khuda huun main
badalti rahti hai duniya mire khayalon ki
kabhi mila huun kabhi yaar se juda huun main
hayat-o-maut ke jalve hain meri hasti men
taghayyurat-e-do-alam ka aaina huun main
tiri ata ke tasadduq tire karam ke nisar
ki ab to apni nazar men bhi dusra huun main
baqa ki fikr na andesha-e-fana mujh ko
taayyunat ki had se guzar gaya huun main
mujhi ko dekh len ab tere dekhne vaale
tu aina hai mira tera aina huun main
main mit gaya huun to phir kis ka naam hai ‘bedam’
vo mil gae hain to phir kis ko dhundhta huun main
Leave a Reply