vo hazar ham pe jafa sahi koi shikva phir bhi rava nahin
ki jafa to un ki ḳhata nahin jinhen koi qadr-e-vafa nahin
miri bad-zani pe ye ranjishen to kisi bhi taur baja nahin
ki jahan-e-ishq men bad-zani to huzur jurm-o-ḳhata nahin
mire ishq ko tiri be-ruḳhi hi nasib hai to yahi sahi
tiri be-ruḳhi rahe shadman mujhe be-ruḳhi ka gila nahin
ye ghalat ki mahfil-e-naz men koi ashna-e-nazar na tha
koi tum se kah to raha tha kuchh magar aah tum ne suna nahin
unhen aur ilm-e-rah-e-vafa ye yaqin bhi aae to kis tarah
ki unhi ke daman-e-naz par kahin ḳhak-e-rah-e-vafa nahin
mire ai dil-e-alam-ashna kisi vahm men na ho mubtala
tujhe rakh sakenge vo yaad kya kabhi jin ka dil hi dukha nahin
ye mah-e-do-hafta ki chandni men dil-e-shikasta ki hasraten
kabhi mere dil hi se puchh lo jo tumhare dil ko pata nahin
ye kamal-e-jazba-o-sar nahin tire sang-e-dar hi ki baat hai
tire ek dar pe jo jhuk gaya vo hazar dar pe jhuka nahin
unhen yuun na dar se haTaiye unhen kuchh to de ke hi Taliye
ki vahi gharib-e-dayar hain vo gharib jin ka ḳhuda nahin
Leave a Reply