jab pari-ru hijab karte hain
dil ke darpan kuun aab karte hain
gardish-e-chashm ka dikha yak daur
ham kuun mast-e-sharab karte hain
atish-e-ishq ki agan suun jala
ashiqan kuun kabab karte hain
taab dikhla jamal-e-raushan ka
aarsi gharq-e-ab karte hain
bait-e-abru pe til suun kajal ke
nuqta-e-intiḳhab karte hain
araq-e-gul-ruḳhan ko dekh ushshaq
mail itr-e-gulab karte hain
dekh us ke hina kuun mardum-e-chashm
ḳhun-e-dil suun ḳhizab karte hain
sun suḳhan-dan tiri ghazal ‘da.ud’
afrin kar ḳhitab karte hain
Leave a Reply