bataun kya tujhe ai ham-nashin kis se mohabbat hai
main jis duniya men rahta huun vo is duniya ki aurat hai
sarapa rang-o-bu hai paikar-e-husn-o-latafat hai
bahisht-e-gosh hoti hain guhar-afshaniyan us ki
vo mere asman par akhtar-e-subh-e-qayamat hai
surayya-bakht hai zohra-jabin hai mah-e-talat hai
mira iman hai meri zindagi hai meri jannat hai
meri ankhon ko khira kar gaiin tabaniyan us ki
vo ik mizrab hai aur chhed sakti hai rag-e-jan ko
vo chingari hai lekin phunk sakti hai gulistan ko
vo bijli hai jala sakti hai saari bazm-e-imkan ko
abhi mere hi dil tak hain sharer-samaniyan us ki
zaban par hain abhi ismat o taqdis ke naghme
vo badh jaati hai is duniya se aksar is qadar aage
mire takhil ke baazu bhi us ko chhu nahin sakte
mujhe hairan kar deti hain nukta-daniyan us ki
jabin par saya-gustar partav-e-qindil-e-rahbani
azar-e-narm-o-nazuk par shafaq ki rang-afshani
qadam par lotti hai azmat-e-taj-e-sulaimani
azal se mo’taqid hai mahfil-e-nuraniyan us ki
adaen le ke aai hai vo fitrat ke khazanon se
jaga sakti hai mahfil ko nazar ke tazyanon se
vo malka hai khiraj us ne liye hain bostanon se
bas ik main ne hi aksar ki hain na-farmaniyan us ki
vo meri juraton par be-niyazi ki saza dena
havas ki zulmaton par naaz ki bijli gira dena
nigah-e-shauq ki bebakiyon par muskura dena
junun ko dars-e-tamkin de gaiin nadaniyan us ki
vafa khud ki hai aur meri vafa ko azmaya hai
mujhe chaha hai mujh ko apni ankhon par bithaya hai
mira har sher tanhai men us ne gungunaya hai
suni hain main ne aksar chhup ke naghma-khvaniyan us ki
mire chehre pe jab bhi fikr ke asar paae hain
mujhe taskin di hai mere andeshe mitae hain
mire shane pe sar tak rakh diya hai giit gaae hain
miri duniya badal deti hain khush-alhaniyan us ki
lab-e-lalin pe lakha hai na rukhsaron pe ghaza hai
jabin-e-nur-afshan par na jhumar hai na tiika hai
javani hai suhag us ka tabassum us ka gahna hai
nahin aluda-e-zulmat sahar-damaniyan us ki
koi mere siva us ka nishan pa hi nahin sakta
koi us bargah-e-naz tak ja hi nahin sakta
koi us ke junun ka zamzama ga hi nahin sakta
jhalakti hain mire ashar men jaulaniyan us ki
Leave a Reply