Laga Ki Jaise Kisi Kanpte Hiran Ko Chhua

Faiz Khalilabadi

laga ki jaise kisi kanpte hiran ko chhua

hamare hathon ne jab phuul se badan ko chhua

tamam jism men asudgi si phail ga.i

tire dahan ne kabhi jab mire dahan ko chhua

simaT ke aa ga.i kaghaz pe surat-e-ash.ar

hamari fikr ne jab bhi kisi ghuTan ko chhua

ka.i maqam pe donon mile zarur magar

kishan ne radha ko radha ne kab kishan ko chhua

lipaT ke pahuncha main jab nekiyon ki ḳhushbu men

lahad ki miTTi ne Darte hue kafan ko chhua

kabhi na ho saki iz.har-e-ishq ki jur.at

ye aur baat ka.i suraton ne man ko chhua

ham apni jaan bhi kar denge ‘faiz’ us pe nisar

agar kisi ne kabhi azmat-e-vatan ko chhua