namak nigahon men honTon men za.iqa na raha
unhen rijhane ka ab ham men hausla na raha
na taak jhank na hi chilmanen darichon par
jahan bhi dekhiye nazron ka rabta na raha
piro ke haar rahi jis ki muntazir barson
vo lamha bhar bhi mire samne khaḌa na raha
ajab zamana hai banti hain joḌiyan pal-pal
rahi pasand svayamvar ka marhala na raha
kisi ke marne ka gham ab kisi ke dil men nahin
mohabbaton ka kisi dil men bhi sila na raha
aur is ke ba.ad hi main jiit ki kagar pe tha
aur is ke ba.ad hi un se muqabla na raha
ḳhuda-e-vaqt bana jab se pahre-dar apna
ḳhuda ka shukr tahaffuz ka silsila na raha
unhen ye dukh ki ulaT di hai main ne hi baazi
mujhe ye gham ki mire haath men diya na raha
kahan se aa.e hain ‘iraj’ ye but-tarash yahan
ki shahr-e-dil ka bhi mahfuz a.ina na raha
Leave a Reply