Dil Ko Dard-Ashna Kiya Tu Ne

Altaf Hussain Hali

dil ko dard-ashna kiya tu ne

dard-e-dil ko dava kiya tu ne

tab-e-insan ko di sirisht-e-vafa

ḳhaak ko kimiya kiya tu ne

vasl-e-janan muhal Thahraya

qatl-e-ashiq rava kiya tu ne

tha na juz gham bisat-e-ashiq men

gham ko rahat-faza kiya tu ne

jaan thi ik vabal furqat men

shauq ko jan-guza kiya tu ne

thi mohabbat men nang minnat-e-ghair

jazb-e-dil ko rasa kiya tu ne

raah zahid ko jab kahin na mili

dar-e-mai-ḳhana va kiya tu ne

qat.a hone hi jab laga paivand

ghair ko ashna kiya tu ne

thi jahan karvan ko deni raah

ishq ko rahnuma kiya tu ne

naav bhar kar jahan Duboni thi

aql ko naḳhuda kiya tu ne

baḌh ga.i jab pidar ko mehr-e-pisar

us ko us se juda kiya tu ne

jab hua mulk o maal rahzan-e-hosh

badshah ko gada kiya tu ne

jab mili kam-e-jan ko lazzat-e-dard

dard ko be-dava kiya tu ne

jab diya rah-rau ko zauq-e-talab

sa.i ko na-rasa kiya tu ne

parda-e-chashm the hijab bahut

husn ko ḳhud-numa kiya tu ne

ishq ko tab-e-intizar na thi

ghurfa ik dil men va kiya tu ne

haram abad aur dair ḳharab

jo kiya sab baja kiya tu ne

saḳht afsurda tab.a thi ahbab

ham ko jaadu nava kiya tu ne

phir jo dekha to kuchh na tha ya rab

kaun puchhe ki kya kiya tu ne

‘hali’ uTTha hila ke mahfil ko

aḳhir apna kaha kiya tu ne