ye jo biphre hue dhare liye phirta huun main
apne hamrah kinare liye phirta huun main
tabish o taab liye aa.ega suraj mera
raat bhar sar pe sitare liye phirta huun main
barg-e-avara-sifat saath mujhe bhi le chal
tere andaz to saare liye phirta huun main
ye alag baat chura leta hai nazren apni
us ki a.ankhon men nazare liye phirta huun main
kohr men Duubi ye sarma ki saver ai duniya
tum samajhti ho tumhare liye phirta huun main
jaane kya baat hai puure hi nahin hote hain
jaane kya dil men ḳhasare liye phirta huun main
phuul honTon pe hansi ke hain mahakte hue ‘shaz’
aur sanson men sharare liye phirta huun main
Leave a Reply