Ye Jo Biphre Hue Dhaare Liye Phirta Hun Main

ye jo biphre hue dhāre liye phirtā huuñ maiñ

apne hamrāh kināre liye phirtā huuñ maiñ

tābish o taab liye aa.egā sūraj merā

raat bhar sar pe sitāre liye phirtā huuñ maiñ

barg-e-āvāra-sifat saath mujhe bhī le chal

tere andāz to saare liye phirtā huuñ maiñ

ye alag baat churā letā hai nazreñ apnī

us kī ā.ankhoñ meñ nazāre liye phirtā huuñ maiñ

kohr meñ Duubī ye sarmā kī saver ai duniyā

tum samajhtī ho tumhāre liye phirtā huuñ maiñ

jaane kyā baat hai puure hī nahīñ hote haiñ

jaane kyā dil meñ ḳhasāre liye phirtā huuñ maiñ

phuul hoñToñ pe hañsī ke haiñ mahakte hue ‘shāz’

aur sāñsoñ meñ sharāre liye phirtā huuñ maiñ

Leave a Comment