ai zindagi mujhe tira koi to ab sira mile
ki kis nagar milegi tu koi to ab pata mile
kisi ki yaad ne hamen to khud se duur kar diya
bas apne aap se hamen koi to ab juda mile
na jin ki hichkiyon ko koi shana aaj tak mila
unhi ke ansuon ko bhi koi to ab jagah mile
bas apne bam-o-dar se ham na ashna rahe sada
koi to rahbar mile koi to ab khuda mile
jo thak gae hain dar-ba-dar vafa tiri talash men
zamin ki god men unhen koi to ab jagah mile
koi junun se ja kahe mujhe na ab talash kar
ki agahi ke dasht men koi to ab sada mile
ujad chukin hain bastiyan basengi, kis tarah bhala
vafa ke dar se bas hamen koi to ab dava mile
hain ek jaise aks aur ek si sarisht bas
hujum hai hujum men koi to ab juda mile