Jo Ba-Kirdar Ho Usko Siyani Kaun Kahta Hai

jo ba-kirdar ho us ko siyani kaun kahta hai

kisi mazdur ki beTi ko raani kaun kahta hai

bajaT jab saare lag jaa.en vazarat ki hi kursi par

to is tarz-e-ma.ishat ko girani kaun kahta hai

mohabbat ke fasane aaj bhi tahrir hote hain

bahar-e-zindagani ko purani kaun kahta hai

miri naani sunati thi hikayat saat pariyon ki

vo sachche pyaar ki lori suhani kaun kahta hai

nahin miTta miTane se kisi se pyaar ka rishta

mohabbat to haqiqat hai kahani kaun kahta hai

ata umr-e-ravan ne ki hai jo saughat balon ko

utarti chandni ko naujavani kaun kahta hai

sabhi ne ap-biti aur jag-biti kahi lekin

mire andaz se sachchi kahani kaun kahta hai

kuchh aise log hote hain jo mar ke bhi nahin marte

hain jin ke naam zinda un ko faani kaun kahta hai

jo mere lab nahin kahte mire ash.ar kahte hain

jo dil tahrir karta hai zabani kaun kahta hai

‘sabila’ apne gham ko main chhupa leti to huun lekin

girati hain jo ankhen un ko paani kaun kahta hai