Arif Abdul Mateen
jo ubhre vaqt ke sanche men Dhal ke
vo Duube ek aalam ko badal ke
gham-e-manzil tujhe shayad ḳhabar ho
yahan pahunche hain kitne kos chal ke
ab un ke paas aansu hain na aahen
jo gham ki aag se nikle hain jal ke
zamin ki ek hi jumbish bahut hai
zamin se aa malenge ye mahal ke
hamin ne raston ki ḳhaak chhani
hamin aa.e hain tere paas chal ke
in ankhon ne ye an-honi bhi dekhi
nasim-e-sub.h guzri gul masal ke
zamana kyuun tujhi par mar raha hai
bahane jab ki lakhon hain ajal ke
tiri guftar par aalim fida hai
tiri baton men tevar hain ghazal ke
sahar hone ko hai ‘arif’ ḳhudara
ghaḌi bhar so raho pahlu badal ke
Leave a Reply