Muztar Khairabadi
aap kyuun baiThe hain ghusse men miri jaan bhare
ye to farma.iye kya zulf ne kuchh kaan bhare
jaan se jaa.e agar aap ko chahe koi
dam nikal jaa.e jo dam aap ka insan bhare
liye phirte hain ham apne jigar-o-dil donon
ek men dard bhare ek men arman bhare
daman-e-dasht ne aansu bhi na puchhe afsos
main ne ro ro ke lahu saikḌon maidan bhare
tegh-e-qatil ko gale se jo lagaya ‘muztar’
khinch ke boli ki baḌe aa.e tum arman bhare
Leave a Reply