Lab-E-Rangin Se Agar Tu Guhar-Afshan Hota

lab-e-rangin se agar tu guhar-afshan hota

lucknow lalon ke madan se badakhshan hota

ai pari tu vo pari hai ki tiri dekh ke shakl

har farishta ki tamanna hai ki insan hota

rah gaya parda mira varna tire jaate hi

na ye daman nazar aata na gareban hota

aa nikalta kabhi zahid jo tiri mahfil men

haath men shisha-e-mai taaq pe quran hota

khair guzri jo khule balon ko us ne bandha

varna majmua anasir ka pareshan hota

mar gaya zulf ki main pech utha kar ai ‘barq’

kyuun na afsana mira khvab-e-pareshan hota

Leave a Comment