dhuup se bar-sar-e-paikar kiya hai main ne
apne hi jism ko divar kiya hai main ne
jab bhi sailab mire sar ki taraf aaya hai
apne hathon ko hi patvar kiya hai main ne
jo parinde miri ankhon se nikal bhage the
un ko lafzon men giraftar kiya hai main ne
pahle ik shahr tiri yaad se abad kiya
phir usi shahr ko mismar kiya hai main ne
bar-ha gul se jalaya hai gulistanon ko
bar-ha aag ko gulzar kiya hai main ne
janta huun mujhe maslub kiya ja.ega
ḳhud ko sach kah ke gunahgar kiya hai main ne
Leave a Reply