Afzal Ahmad Syed
jis ka koi intizar na kar raha ho
use nahin jaana chahiye
vapas
akhiri darvaza band hone se pahle
jis ka koi intizar na kar raha ho
use nahin phirna chahiye
be-qarar
ek khubsurat rahdari men
jab tak vo viran na ho jaae
jis ka koi intizar na kar raha ho
use nahin juda karna chahiye
khun-alud paanv se
ek puura safar
jis ka koi intizar na kar raha ho
use nahin maalum karni chahiye
phulon ke ek daste ki qimat
ya din tarikh aur vaqt
Leave a Reply