Safi Aurangabadi
dam-e-ḳhayal-e-zulf-e-butan se chhuḌa liya
kya baal baal mujh ko ḳhuda ne bacha liya
ab us ko rahm aa.e ye qismat ke haath hai
ban jaa.e baat haal to ham ne bana liya
sharma ke munh chhupane ka andaz dekhna
goya ki us ne aib hamara chhupa liya
ya ye ki ham ne tark-e-mohabbat ki Thaan li
ya ye hua ki aaj kisi ko mana liya
hota huun ek naale pe men qatl haa.e haa.e
avaz de ke apni qaza ko bula liya
zalim fareb de ke na le dil gharib ka
ik roz kaam aa.ega tera diya liya
rashk-e-raqib ho ki gham-e-duri-e-habib
jo vaqt par nasib hua ham ne kha liya
main kya kahun ke jaan rahi kis azaab men
jab us ne mujh ko apni barabar biTha liya
jhuTa sahi zalil sahi koi kuchh kahe
main ne to aaj un ko gale se laga liya
puchhi hai dost ban ke mire dil ki aarzu
us ne zaban de ke mira mudda.a liya
le koi shaan ki to bas itna kiya karo
jis se koi baḌa.i suni aazma liya
mehman dost ko jo kiya doston ke saath
dekha tha jis ko dida-varon ko dikha liya
us ki bhi maut sahal ho sakrat se bache
jis ne hamari naza.a men naam aap ka liya
baiThe to baat karne na di bazm-e-ghair men
uTThe to apne saath hi mujh ko uTha liya
dil ka hi ek naam hai shayad ḳhayal bhi
aisa agar nahin hai to dil us ne kya liya
ma.ashuq ko to jalva-numa.i zarur hai
dekho aziiz misr ke so main dikha liya
is darja tu ne ḳhasta kiya ai gham-e-firaq
ham ko hamari gor ne honTon se kha liya
samjha safi’ ko aap ne jo kuchh ghalat hai ye
duniya ka bad-ma.ash zamane ka chaliya
Leave a Reply