zindagi chupke se ik baat kaha karti hai
vaqt ke hathon men kab dor raha karti hai
sard si shamon men chalti hai udasi ki hava
chandni raat bhi khamosh raha karti hai
tum to aae ho gulabon ke liye der ke baad
qarya-e-jan men to ab khaak uda karti hai
be-sabab ankhon men aansu bhi nahin aate ab
vahshat-e-dil bhi kahin duur raha karti hai
raushni men to nazar aate hain kitne saae
par ye tariki to saaya bhi juda karti hai
ham bhi kho jaenge ik roz ufuq par yunhi
kab kisi se ye ‘farah’ ziist vafa karti hai
Leave a Reply