bistar-e-marg par zindagi ki talab
jaise zulmat men ho raushni ki talab
kal talak kamtari jin ki taqdir thi
aaj un ko hui bartari ki talab
umr bhar apni puuja karata raha
ab hui us ko bhi bandagi ki talab
chiḳhte the bahut ham har ik baat par
ho ga.i ab magar ḳhamushi ki talab
pyaas duniya ki jis ne bujha.i sada
us samundar ko hai tishnagi ki talab
chaar paise jo aa.e zara haath men
un ko bhi ho ga.i rahbari ki talab
dekh kar ye numa.ish ki duniya ‘asad’
ham ne mahsus ki sadgi ki talab
Leave a Reply