kya ho taskin jo ho teri sukunat dil men
rahe aghosh men ya pyaar ki surat dil men
maut chahun to karun soz-e-mohabbat ka ilaaj
kya rahega na rahegi jo hararat dil men
dil-nashin hai jo mujhe talib-e-izzat hona
chhup ke baiTha hai koi sahab-e-izzat dil men
dil ko sab log ye kahte hain ḳhuda ka ghar hai
main samajhta huun ki hai teri amanat dil men
sun raha huun vo ayadat ke liye aate hain
aaj hai pursish-e-amal ki haibat dil men
tauba tauba main samajhta tha ki dil hai betab
ḳhud vo betab hai jis ki hai sukunat dil men
dil men rahne ka tujhe haq to hai lekin ai shoḳh
kaash hoti tire chehre ki matanat dil men
jante hain miri be-rah-ravi ke asbab
mante hain mujhe yaran-e-tariqat dil men
Than ga.i thi tire aḳhlaq ki beja tarif
ab na aata to ye aa.i thi shararat dil men
hai abhi tak to faqat sikva-e-dushman ai dost
kahin paida na ho kuchh aur shikayat dil men
chahta huun jise ban jaa.e agar vo saaqi
baḌhti jaa.e havas-e-kausar-o-jannat dil men
zauq-e-didar bhi kya chiiz hai allah allah
meri ankhon men basarat hai basirat dil men
kaash min-jumla-e-azar-e-mohabbat nikle
kar-farma nazar aati hai jo quvvat dil men
hain abhi tak tumhen duniya ke maze yaad safi’
ashiqi karte ho rakh kar ye malamat dil men
Leave a Reply