Aaj

kar-farma phir mira zauq-e-ghazal-khvani hai aaj

phir nafas ka saz-e-garm-e-shoala-afshani hai aaj

phir nigah-e-shauq ki garmi hai aur ru-e-nigar

phir araq-alud ik kafir ki peshani hai aaj

phir mire lab par qaside hain lab-o-rukhsar ke

phir kisi chehre pe tabani si tabani hai aaj

husn is darja nashat-e-husn men Duuba hua

ankhdiyan be-khud shamim-e-zulf divani hai aaj

larzish-e-lab men sharab-o-sher ka tufan hai

jumbish-e-mizhgan men afsun-e-ghazal-khvani hai aaj

vo nafas ki zamzama-sanji nazar ki guftugu

sina-e-maasum men ik-tarfa tughyani hai aaj

yaan ba-in aalim ghurur-e-yusufiyat bhi nahin

vaan zulekhai ba-azm-e-chak-damani hai aaj

vaan ishare hain bahak jaana hi aish-e-hosh hai

hosh men rahna yaqinan sakht nadani hai aaj

kashmakash si kashmakash men hai mazaq-e-ashiqi

kamran si kamran har sai-e-imkani hai aaj

husn ke chehre pe hai nur-e-sadaqat ki damak

ishq ke sar par kulah-e-fakhr-e-insani hai aaj

shauq se mauqa-shanasi ki tavaqqo bhi ghalat

main ne un ki shakl bhi mushkil se pahchani hai aaj

Leave a Comment