ik ranj-e-umr de ke chala hai kidhar mujhe
galiyon men rol den na mire bal-o-par mujhe
dil parbaton ke paar na chal de hava ke saath
badal bana na de miri ḳhu-e-safar mujhe
main ne jinhen chhua unhen shahkar kar diya
ai kaash chhu sake mira dast-e-hunar mujhe
tum se bichhaḌ ke umr bhar ik soch hi rahi
kya ho tum ek roz bhula do agar mujhe
be-barg-o-bar kar ga.i andhi mira badan
ḳhush tha ye soch kar ki lage hain samar mujhe
ai dasht-dar dekh chaman-zar ki taraf
pag pag pukarte hain mire ham-safar mujhe
azad kar ‘najib’ giraftar-e-ramz ko
rangon men khol ai mire rang-e-hunar mujhe
Leave a Reply