Poet
yuun to yusuf se hasin aur javan the pahle
aap se log zamane men kahan the pahle
roz-e-avval se hain ham soḳhta-dil kushta-e-gham
aaj jaise hain yunhi sho.ala-ba-jan the pahle
ishq ne khol diye ham pe vo asrar-e-hayat
jo zamane ki nigahon se nihan the pahle
aḳhir aana hi paḌa lauT ke teri janib
qafile dil ke ba-har-samt-e-ravan the pahle
un baharon ko ajab rang men paaya ham ne
jin se vabasta hasin vahm-o-guman the pahle
vo siyah-baḳht yahan mahv-e-fughan aaj bhi hain
jo siyah-baḳht yahan mahv-e-fughan the pahle
marhale ishq ke asan samajh baiThe the
‘mansha’ ham log bhi kya sada-guman the pahle
Leave a Reply