Basir Sultan Kazmi
ziyan jigar ka sahi ye jo shaghl-e-bada hai
dil-o-nazar ke liye is men kuchh ifada hai
dikha.i di hai jhalak us ki ek muddat ba.ad
ye ḳhvab mere liye ḳhvab se ziyada hai
mila.ega ye kisi shahrah se mujh ko
miTa miTa sa jo qadmon men mere jaada hai
yahi bacha.ega tum dekhna miri baazi
bisat par jo ye nachiz sa piyada hai
ye soch kar vo miri baat kaaT dete hain
ki ho na ho ye kisi baat ka i.aada hai
yahan rahenge vo mere harif ke hamrah
unhen guman hai mira dil bahut kushada hai
vo ahl-e-bazm ki rangin-nava.i apni jagah
hazar rang liye mera harf saada hai
agar ḳhuda ne nikala buton ke chakkar se
tavaf-e-ka.aba ka ab ke baras irada hai
Leave a Reply