ham sab ko batate rahte hain ye baat purani kaam ki hai
das biis gharon men charche hon tab ja ke javani kaam ki hai
ye vaqt abhi tham ja.ega mahaul men dil ram ja.ega
bas aap yunhi baiThe rahiye ye raat suhani kaam ki hai
asan bhi hai dushvar bhi hai dukh-sukh ka baḌa bazar bhi hai
malum nahin to mujh se suno ye duniya divani kaam ki hai
mash.hur bhi hain badnam bhi hain ḳhushiyon ke na.e paigham bhi hain
kuchh gham ke baḌe in.aam bhi hain paḌhiye to kahani kaam ki hai
jo log chale hain ruk ruk kar hamvar zamin par jhuk jhuk kar
vo kaise bata.enge tum ko dariya ki ravani kaam ki hai
Leave a Reply