Poet
raat bhi baaqi hai sahba bhi shisha bhi paimana bhi
aise men kyuun chheḌ na den ham zikr-e-gham-e-janana bhi
basti men har ik rahta hai apna bhi begana bhi
haal kisi ne puchha dil ka dard kisi ne jaana bhi
haa.e tajahul aaj hamin se puchh rahe hain ahl-e-ḳhirad
sunte hain is shahr men rahta hai koi divana bhi
aḳhir saf tak aate aate har paimana chhalka hai
lekin ham tak aate aate TuuT gaya paimana bhi
jis se dil ka zaḳhm hara ho aisa koi zikr na chheḌ
jis men us ka naam na aa.e aisa ik afsana bhi
shahr ki ranga-rang nigaro dil valon ki qadr karo
mahfil men donon jalte hain sham.a bhi parvana bhi
Leave a Reply