teri aghosh men niDhal huun main
bhigti raat ka zaval huun main
jitna suljhaoge aur uljhoge
vaqt ka ik baḌa saval huun main
aur pichhle-pahar gale mil le
Dubti raat ka kamal huun main
apne andar simaTta jaata huun
ḳhushk dariya ka ek jaal huun main
fasle qarnon ke juda.i men
tera maazi huun apna haal huun main
kya samajh ke hansa hai tu mujh par
tere hi aa.ine ka baal huun main
ye ‘musavvir’ bhanvar men aa ke khula
Dubne men bhi be-misal huun main
Leave a Reply