kuchh bas na chala jazba-e-ḳhud-kam ke aage
jhukna hi paḌa us but-e-badnam ke aage
ik aur bhi hasrat hai pas-e-hasrat-e-didar
ik aur bhi aghaz hai anjam ke aage
aa aur idhar koi tajalli ki kiran phenk
baiThe hain gada tere dar-o-bam ke aage
ye ishq hai bazicha-e-atfal nahin hai
kuchh aur bhi hai kucha-e-asnam ke aage
yuun un ki jafaon se mili ham ko basirat
ham jhuk na sake gardish-e-ayyam ke aage
din Dhalne laga dil-zadagan dil ki ḳhabar lo
ik silsila-e-hijr bhi hai shaam ke aage
ab kuchh bhi nahin hasil-e-tadbir-e-mohabbat
ab kuchh bhi nahin nama-o-paigham ke aage
ik sehr sa taari tha ‘zahir’ ahl-e-ḳhirad par
the mohr-ba-lab husn-e-dil-aram ke aage
Leave a Reply