Dil Ki Wahshat Ne Wo Diwana Banaya Mujhko

Poet

dil ki vahshat ne vo divana banaya mujh ko

duur bhage hai mira chhoḌ ke saaya mujh ko

haath uThane ke nahin ishq-e-butan se naseh

laakh ki ek kahi aur na bakva mujh ko

ek to jaur-e-butan dusri ye aur suno

chain deta nahin ik dam dil-e-shaida mujh ko

tark-e-adab na ho ḳhanjar-e-qatil ke tale

jaan de o dil-e-betab na taḌpa mujh ko

ghuncha-e-gul na samajhna dil-e-ashiq huun main

tu hi janegi saba dekh jo chheḌa mujh ko

kuchh bhi ghairat hai tujhe dekh tu ai ḳhana-ḳharab

log kahte hain tire ishq men kya kya mujh ko

sho.ala-e-ishq ki garmi ne shab-e-furqat men

sham.a saan sub.h se pahle hi nabeḌa mujh ko

dil ko le bhage hain jab mangun huun dikhla ruḳh-o-zulf

bas batate hain yuun hi sham-o-savera mujh ko

‘aish’ ise ḳhubi-e-qismat ke siva kya kahiye

dil mila hai so vo labrez-e-tamanna mujh ko