Sirajuddin Zafar
shauq raton ko hai darpai ki tapan ho ja.un
raqs-e-vahshat men uThun aur dhuan ho ja.un
saath agar bad-e-sahar de to pas-e-mahmil-e-yar
ik bhaTakti hui avaz-e-fughan ho ja.un
ab ye ehsas ka aalam hai ki shayad kisi raat
nafas-e-sard se bhi sho.ala-ba-jan ho ja.un
la surahi ki karun vahm-o-guman gharq-e-sharab
is se pahle ki main ḳhud vahm-o-guman ho ja.un
vo tamasha huun hazaron mire a.ine hain
ek a.ine se mushkil hai ayaan ho ja.un
shauq men zabt hai malhuz magar kya ma.alum
kis ghaḌi be-ḳhabar-e-sud-o-ziyan ho ja.un
aisa andaz-e-ghazal ho ki zamane men ‘zafar’
daur-e-a.inda ki qadron ka nishan ho ja.un
Leave a Reply