chashm-e-pur-nam abhi marhun-e-asar ho na saki
zindagi ḳhak-nashinon ki basar ho na saki
mai-kade ki vahi manus faza aur dil-e-zar
ek bhi raat ba-andaz-e-digar ho na saki
gham-e-janan gham-e-dauran ki guzargahon se
guzre kuchh aise ki ḳhud apni ḳhabar ho na saki
dhundle dhundle nazar aate to hain qadmon ke nishan
garche pur-nur abhi rahguzar ho na saki
zindagi jam-ba-kaf aa.i bhi mahfil men magar
shab ke matvalon ko taufiq-e-nazar ho na saki
kaise tabinda sitaron ka lahu jalta hai
shab-e-tarik jo unvan-e-sahar ho na saki
Leave a Reply