ishq vo ishq hai jo jazb-o-asar tak pahunche
husn vo husn hai jo ahl-e-nazar tak pahunche
dil ke hathon na kisi dil ko zarar tak pahunche
lab par aa.i hui kyon fitna-o-shar tak pahunche
kyon mohabbat men koi naqd-o-nazar tak pahunche
mujh ko tauhin-e-vafa ki na ḳhabar tak pahunche
tishnagi zauq-e-takallum ki vahi hai ab tak
us ke jalve to bahut meri nazar tak pahunche
ek ham hain jo rahe taba-e-farman ho kar
ek tum ho jo abas fitna-o-shar tak pahunche
na-tavani thi har ik gaam pe maa.il lekin
ham umidon ke sahare tire dar tak pahunche
dekhiye aur hai kya apne muqaddar men abhi
zulmat-e-shab se to hain nur-e-sahar tak pahunche
main to har aag ko gulzar bana sakta huun
kaun aisa hai jo us husn-e-nazar tak pahunche
aap ne mujh ko mire haal pe chhoḌa hota
aap be-kar mire aib-o-hunar tak pahunche
un ki furqat men mira shaghl yahi tha din-rat
haath jab dil se uThe dida-e-tar tak pahunche
ai ‘kanval’ mujh pe unhon ne bhi karam farmaya
vo bhi ab bahr-e-ayadat mire ghar tak pahunche
Leave a Reply