Muslim Shameem
chaar su ḳhauf-e-tirgi hai bahut
shab ko ehsas-e-bartari hai bahut
hukm-e-taza hai un ko gul kar do
jin charaghon se raushni hai bahut
naḳhl-e-jan phir jhulas na jaa.e kahin
dhuup ehsas ki kaḌi hai bahut
jam-e-mai ho ki saghar-e-zahrab
kuchh bhi aa.e ki tishnagi hai bahut
dard ka chand hi nikal aa.e
dil ke sahra men tirgi hai bahut
kam na tha jahl ka azaab ‘shamim’
aur ab karb-e-agahi hai bahut
Leave a Reply