Pirzada Qasim
ajab hain ham ye kis ki sa.i-e-la-hasil pe rote hain
abhi zinda hain aur nakami-e-qatil pe rote hain
hamen rah rah ke tufan ki rifaqat yaad aati hai
hain ab asuda-e-sahil khaḌe sahil pe rote hain
bahut ham ko rulaya mazi-o-imroz ne so ab
nashat-e-girya aisa hai ki mustaqbil pe rote hain
giroh-e-ashiqan tha shahr-e-girya un ki manzil thi
ye raste bhar bhi rote aa.e ab manzil pe rote hain
kahan rote hain ham aghaz-e-tansiḳh-e-ta.alluq par
jo khinchi ja chuki hai us had-e-fasil pe rote hain
Leave a Reply