Mushafi Ghulam Hamdani
jab tak ye mohabbat men badnam nahin hota
is dil ke ta.iin hargiz aram nahin hota
aalam se hamara kuchh maz.hab hi nirala hai
ya.ani hain jahan ham vaan islam nahin hota
kab va.ada nahin kartin milne ka tiri ankhen
kis roz nigahon men paigham nahin hota
baal apne baḌhate hain kis vaste divane
kya shahr-e-mohabbat men hajjam nahin hota
milta hai kabhi bosa ne gaali hi paate hain
muddat hui kuchh ham ko in.aam nahin hota
saaqi ke talattuf ne aalam ko chhakaya hai
labrez hamara hi ik jaam nahin hota
kyuun tirgi-e-tal.e kuchh tu bhi nahin karti
ye roz-e-musibat ka kyuun shaam nahin hota
phir meri kamand us ne Daale hi tuḌa.i hai
vo ahu-e-ram-ḳhurda phir raam nahin hota
ne ishq ke qabil hain ne zohd ke darḳhur hain
ai ‘mus.hafi’ ab ham se kuchh kaam nahin hota
Leave a Reply