Sulaiman Jazib
ahval-e-dil-e-zar sunaya nahin jaata
jo raaz ayaan ho vo bataya nahin jaata
apna to dil-e-zar hai dana.i se ḳhali
nadan se nadan manaya nahin jaata
tum hi ye batao main bhula.un tumhen kaise
is dil se koi naqsh miTaya nahin jaata
sar phoḌna mushkil nahin hota hai junun men
divar se ashiq ko lagaya nahin jaata
ta.abir mile ya na mile baat alag hai
ankhon se magar ḳhvab churaya nahin jaata
us shahr ki tauqir hain ‘jazib’ hi se ashiq
ushshaq ko nazron se giraya nahin jaata
Leave a Reply