jala diya shajar-e-jan ki sabz-baḳht na tha
kisi bhi rut men hara ho ye vo daraḳht na tha
vo ḳhvab dekha tha shahzadiyon ne pichhle pahar
phir us ke baad muqaddar men taaj o taḳht na tha
zara se jabr se main bhi to tuut sakti thi
miri tarah se tabiat ka vo bhi saḳht na tha
mire liye to vo ḳhanjar bhi phuul ban ke utha
zaban saḳht thi lahja kabhi karaḳht na tha
andheri raton ke tanha musafiron ke liye
diya jalata hua koi saz-o-raḳht na tha
gae vo din ki mujhi tak tha mera dukh mahdud
ḳhabar ke jaisa ye afsana laḳht-laḳht na tha