insaniyat na jis men ho vo aadmi nahin
jis men huzur qalb na ho bandagi nahin
jis men junun-e-shauq na ho ashiqi nahin
dil ka moamla hai koi dil-lagi nahin
rahta hai mere darpai-e-azar phir bhi vo
us se agarche meri koi dushmani nahin
raton ki niind din ka sukun ho gaya haram
puchha jo kab miloge to bola kabhi nahin
khvabida hasraton ka na ho jis men inikas
hai kargah-e-shishagari shairi nahin
us ki sharab-e-nab se badh kar hai chashm-e-mast
jis ke baghair lutf-e-mai-o-mai-kashi nahin
naqd-e-sukhan jo karta hai vo ho sukhan-shanas
jauhar-shanas ho na agar jauhari nahin
‘barqi’ jo khud-shanas hai vo hai khuda-shanas
gum-gashtagi-e-hosh-o-khirad be-khudi nahin
Leave a Reply