Basir Sultan Kazmi
mun.im na haath khinch madad se gharib ki
rozi hai tere rizq men us ke nasib ki
hairan-kun thi chup bhi tumhari mire liye
bole ho ab to baat bhi tum ne ajiib ki
saman-e-aish dekh ke bazm-e-nashat men
rahti hai shab kis ko nasihat tabib ki
kab tak karoge ahl-e-siyasat pe e’tibar
yaaro kabhi suno kisi sha.ir adiib ki
ho jin ki sab tavajjoh samundar ke us taraf
un ko sada suna.i na degi qarib ki
sina-ba-sina karti hai ye har taraf safar
haq baat ko nahin hai zarurat naqib ki
‘basir’ bila muqabla vo muntaḳhab hua
meri shikasta-pa.i hai mohsin raqib ki
Leave a Reply