Saghar Siddiqui
har shai hai pur-malal baḌi tez dhuup hai
har lab pe hai saval baḌi tez dhuup hai
chakra ke gir na ja.un main is tez dhuup men
mujh ko zara sambhal baḌi tez dhuup hai
de hukm badalon ko ḳhayaban-nashin huun
jam-o-subu uchhal baḌi tez dhuup hai
mumkin hai abr-e-rahmat-e-yazdan baras paḌe
zulfon ki chhanv Daal baḌi tez dhuup hai
ab shahr-e-arzu men vo ra.ana.iyan kahan
hain gul-kade niDhal baḌi tez dhuup hai
samjhi hai jis ko saya-e-ummid aql-e-ḳham
‘saghar’ ka hai ḳhayal baḌi tez dhuup hai
Leave a Reply