rusva kiya shu.ur ko dana.i chhin li
jehl-e-ḳhirad ne ankhon se bina.i chhin li
sanson men gunjti hui shahna.i chhin li
shahron ne mujh se gaanv ki purva.i chhin li
is tarah bhi badalte hain nazron ke zaviye
ḳhud ḳhvab hi ne ḳhvab ki ra.ana.i chhin li
ruhon ki muflisi ne bahar-hal ek din
chehra-a.inon se ḳhu-e-shanasa.i chhin li
honT a.inon ke yunhi nahin hain sile hue
arzani-e-jamal ne goya.i chhin li
fitrat ka ye tazad ajib-o-gharib hai
tanha.i dene vaale ne tanha.i chhin li
Leave a Reply