Ahmad Khayal
koi hairat hai na is baat ka rona hai hamen
khaak se utthe hain so khaak hi hona hai hamen
phir taalluq ke bikharne ki shikayat kaisi
jab use kanch ke dhagon men pirona hai hamen
ungliyon ki sabhi poron se lahu rista hai
apne daman ke ye kis daagh ko dhona hai hamen
phir utar aae hain palkon pe sisakte aansu
phir kisi shaam ke anchal ko bhigona hai hamen
ye jo aflak ki vusat men liye phirti hai
is ana ne hi kisi roz dubona hai hamen
Leave a Reply