Poet
soz-e-dil-o-jan aur hai saz-e-dil-o-jan aur
ehsas-e-bayan aur hai idrak-e-nihan aur
duniya-e-mohabbat men zamin aur zaman aur
ik sho.ala-ba-jan naghma-kunan raz-e-nihan aur
sha.ir ka jahan aur hai shatir ka jahan aur
mafhum mohabbat ka yahan aur vahan aur
ai chand ki mafluj fazaon ke musafir
hai muntazir-e-did abhi bazm-e-jahan aur
ḳhud mahv-e-tamasha hain mah-o-mehr-o-kavakib
hai adam-e-ḳhaki tiri manzil ka nishan aur
kuchh duur hujum-e-gham-e-janan se nikal ja
ai ashk-e-ravan sho.ala-e-jan barq-e-tapan aur
ye nuz.hat-o-nik.hat ka tabassum vo tasadum
ye abr-e-karam aur hai aahon ka dhuan aur
tujh ko gham-e-janan gham-e-dauran se badal duun
hai azm-e-javan aur zaman aur saman aur
sarmaya-e-hasti tha kabhi josh-e-taghazzul
ehsas-e-junun aur tha andaz-e-bayan aur
kya ye bhi zamane ka koi turfa asar hai
hai teri ‘aziz’ aaj zaban aur bayan aur
Leave a Reply