baghban jashn-e-baharan nahin hone dete
diip ulfat ke farozan nahin hone dete
zahr ulfat ka pilate hain bade fakhr ke saath
aap insan ko insan nahin hone dete
khud-numai men kuchh is tarah giraftar hain ham
aur logon ko numayan nahin hone dete
aql ko shokhi-e-batil men phansane vaale
qalb ko sahib-e-iman nahin hone dete
gham se nisbat hai jinhen zabt-e-alam karte hain
ashk ko zinat-e-daman nahin hone dete
ruh-e-afkar ko meaar ata karte hain
ham khayalat ko uryan nahin hone dete
chand lamhe vo mire samne rah kar ‘abrar’
chashm-e-betab ko hairan nahin hone dete