Ajay Sahaab
vo mahtab bhi ḳhushbu se bhar gaya hoga
jo chandni ne tiri zulf ko chhua hoga
tire labon se jo nikla tha ik tabassum sa
mire liye to vahi giit ban gaya hoga
likha hai aaj tira naam main ne kaghaz par
ye mera lafz bhi itra ke chal raha hoga
miri palak pe hai ehsas jaise maḳhmal sa
tumhara ḳhvab use chhu ke chal diya hoga
mujhe yaqin hai tere hi surḳh galon ne
dhanak ko shoḳh sa ye rang de diya hoga
jo dekhta hai tira husn roz chhup chhup kar
us aaine ko bhi to ishq ho gaya hoga
Leave a Reply