aaj bhi haath pe hai tere pasine ki tari
ya.ani hai aaj bhi shaḳh-e-shajar-e-dard hari
pas-e-daman na sahi pas-e-gareban hi sahi
tujh pe lazim nahin ai dast-e-junun jama-dari
main ki duniya-e-havas men bhi sar-afraz raha
kaam aa hi ga.i aḳhir miri ashufta-sari
dil ki basti se kabhi yuun na guzarti thi saba
ab na paighambari hai na koi nama-bari
ham ne bhi chhoḌ diya maslak-e-arbab-e-vafa
vo bhi ab bhuul ga.e sheva-e-bedad-gari
raat ka karb sameTe hue apne dil men
jhilmilata hai kahin duur charagh-e-sahari
main ne kis dil se shab-e-gham ki sahar ki hai ‘arib’
yaad aa.egi zamane ko miri be-jigari
Leave a Reply