apni qismat ke hue saare sitare patthar
phuul daman men tire aur hamare patthar
ham bhi iisa ki tarah tum se yahi kahte hain
jo gunahgar nahin hai vahi maare patthar
haq na mil paa.e mashaqqat ka to hota hai yahi
zulm ke samne hote hain sahare patthar
mo.ajiza ishq ka ye bhi hai zamane vaalo
mere angan men hue phuul tumhare patthar
dast-e-nafrat ne kiya paikar-e-iman zaḳhmi
muft men ho ga.e badnam bechare patthar
sone chandi ne to kuchh bhi na diya ham ko ‘zafar’
ya-ḳhuda ab miri qismat ko sanvare patthar
Leave a Reply