Zia Zameer
ḳhaak the kahkashan ke the hi nahin
ham kisi asman ke the hi nahin
us ne aisa kiya nazar-andaz
jaise ham dastan ke the hi nahin
tum ne jo bhi saval ham se kiye
vo saval imtihan ke the hi nahin
chhoḌ kar jo chale ga.e us ko
haan vo hindostan ke the hi nahin
itni jaldi jo bhar ga.e hain zaḳhm
jism ke the ye jaan ke the hi nahin
sher dil men utar nahin paa.e
kyunki dil ki zaban ke the hi nahin
mas.ala tha to bas ana ka tha
fasle darmiyan ke the hi nahin
Leave a Reply