hairan ho raha huun basirat ke naam par
main dekhta kuchh aur huun manzar kuchh aur hai
mujh ko sitara aur koi khinchta hai kyuun
mera ilaqa aur hai mehvar kuchh aur hai
patthar samajh raha hai zamana to kya karun
muTThi men meri jab ki munavvar kuchh aur hai
tasir-e-ḳhak aa.egi alfaz men mire
dil men hai aur baat labon par kuchh aur hai
‘alam’ mujhe bharosa nahin za.ichon pe ab
is men likha tha aur mayassar kuchh aur hai
Leave a Reply