Duaen Mangin Hain Muddaton Tak Jhuka Ke Sar Hath Utha Utha Kar

duaen mangin hain muddaton tak jhuka ke sar haath utha utha kar

hua huun tab main buton ka banda khuda khuda kar khuda khuda kar

dua lab-e-jam ne bhi mangi subu ne bhi haath utha utha kar

hamari mahfil men aaya saaqi khuda khuda kar khuda khuda kar

dikhaya vahdat ne apna jalva dui ka parda utha utha kar

karun main sajda buton ke aage tu ai barahman khuda khuda kar

hain ashk zakhmon se mere jaari na dekhi hogi ye ashk-bari

bani hain chashm-e-pur-ab qatil ye zakhm paani chura chura kar

kahan vo shaklen kahan vo baten kahan vo jalse kahan vo mahfil

ye sab ka sab khvab ka tha saman chhupa liya bas dikha dikha kar

ba-rang-e-saghar mila diya munh jo munh se tere khafa na hona

kiya hai behosh tu ne saaqi sharab mujh ko pila pila kar

uthaya yaron ne par na uttha zamin se hargiz hamara lasha

ye kis ne ham ko hai maar Daala nazar se apni gira gira kar

jo pahunchen ham murgh-e-nama-bar ko to chutkiyon men use uda de

agar-che vo tifl khelta hai par-e-kabutar uda uda kar

pas-az-fana bhi agar tu aae karun sag-e-yar mehmani

ki ustakhvanon ko apne tan men rakha huma se chhupa chhupa kar

gire agar sar-kashi ho mujh se abhi falak ko zamin pe patkun

ki tod Daale main aise miine hazaron shishe utha utha kar

kabhi mire dil se karti hain bal kahi hain shane se ye uljhtin

gharaz ki zulfon ko tu ne zalim bigada hai sar chadha chadha kar

shikast likhta tha naam dil ka yahi thi tifli men mashq teri

bana diya dil-shikan ye tujh ko moallimon ne likha likha kar

bade gile hain ajal ko tujh se masih ko bhi bahut hain shikve

ki dam men tu ne hain maar Daale hazaron murde jila jila kar

pilana paani ka jaam zahid gunah mashrab men hai hamare

savab leta nahin hai kyuun tu sharab mujh ko pila pila kar

nahin koi razdar ham sa kiya na vahshat men tujh ko rusva

ki daagh manind-e-khar-e-mahi badan men rakhe chhupa chhupa kar

gale hazaron ne apne kaate hazaron be-vajh ho gae khuun

bahut hua phir tu yaar nadim kaf-e-hinai dikha dikha kar

nigah ki surat phiro na har su hijab tum mardumuk se sikho

ab aao ankhon men sair dekho mizha ki chilman utha utha kar

dikha ke gul se ezaar tu ne kiya dil-e-ashiqan ko bulbul

bana diye gosh ghairat-e-gul sada-e-rangin suna suna kar

gunah karta hai barmala tu kisi se karta nahin haya tu

khuda ko kya munh dikhaega tu zara tu ai be-haya haya kar

chala hai mahfil se apne saaqi dikhaun main apni ashk-bari

karun bat-e-mai ko murgh-e-abi abhi se dariya baha baha kar

rulae barson hansi tu jis se dikhae gar zulf maar rakkhe

kare tu dar-parda raah dil men jo dekhe parda utha utha kar

vahi asar hai junun ka ab tak vahi hai ladkon ko ab bhi kavish

ki meri mitti ke roz majnun bigadte hain bana bana kar

ajab nahin nama-e-amal ka dila ho kaghaz agar khata ke

khataen kiin main ne ashkara kiye hain isyan chhupa chhupa kar

asar hai chah-e-zaqan ki ulfat ka baad-e-murdan bhi aah baaqi

ki khelti hain hamari mitti ke Dol ladke bana bana kar

kiya hai poshida ishq ham ne kisi se dar-parda hai mohabbat

pade hue bistar-e-alam par jo rote hain munh chhupa chhupa kar

jo khauf tufan-e-ashk se ab nahin hai jaata na jaae qasid

ravan karun su-e-yar-e-jani khaton ki naven bana bana kar

tira sa qad ban saka na hargiz tiri si surat na bin saki phir

agar-che saane ne lakhon naqshe bigad Daale bana bana kar

udhar mizha ne lagai barchhi idhar nigahon ne tiir maare

shikast di fauj-e-sabr-e-dil ko ye kis ne ankhen lada lada kar

kati hai goya shab-e-javani bas aan pahunchi hai subh-e-piri

bahut si ki tu ne but-parasti ab ek do din khuda khuda kar

Leave a Comment